1-1

009090

في البيت، المستشفى، الجامعة، الجمعية، العزائم..كان هناك أشخاص عزيزون عديدون يحييونني بمرحبا، أو هلا. عن الأشخاص الذين بيني وبينهم علاقة اجتماعية و عملية أتحدث. كنت كثيراً أرد على التحية بمثلها وأردفها بتعليق أو سؤال متعجلة لمعرفة شيء ما تذكرته حالما رأيتهم. عندما راجعت دفتر مذكرات العام الذي انصرم منذ دقائق بشرِّه الغالب على خيره غُلباً مذموما، شدتني تعليقاتي في التحيات الصباحية والمسائية بطرافتها وغرابتها و انفعالاتها و تفاهتها أحياناً، أو ربما ببساطتها كما تقول صديقتي التي ترفض صفة التفاهة على شيء مكتوب في دفتر مذكرات. تقول أنه حتى لو كان علامة استفهام، فلها قيمتها لأن المدون لم يكتبها إلا وقد عنَت له شيئاً في لحظة التوثيق. لسبب لا أهتم بالتفكير فيه، جمعت خمسون عبارة قلتها في تلك التحيات، آملة أن يُزهر بعض الياسمين.

1- مرحبا..

  • مرحبا، أنا كنت طلبت رواية سلالة حقت باتريك موديانو. جبتوها ولا لسه؟

2- مرحبا..

  • هلا روضة، بسرعة طلعي النوت اكتب لك الملاحظات قبل ما ننشغل وننسى.

3- مرحبا..

  • مرحبا، يا سلام ايش دا كلو، ماعرفتك.. حلو تعملي سندريللا. بس ترى هنا مافي أمير يخطفك. كلهم ابو سروال وفنيلة.

4- سلام..

  • مو رايحة العزيمة مهما تحاول. لا تضيع وقتك روح احلِق أوفَر لك.

5- مرحبا..

  • هلا سستر.. كتبتي الاندورسمنت والاّ اتعوّد امشّي شفتاتي شوربة ؟!

6- اهلين دكتورة..

  • مريض غرفة 214 مشتكي عشرين مرة! ومحد دق لي بيجر يبلغني. ورايا اشوف ايش هبّبتوا .

7- مرحبا..

  • عزيزتي النيرسز كاتبين لي اندورزمنت سلق بيض. حالاتي أنا كاتبتلها ريبورتات خاصة عندي واعرف امشّي حالي بيها بس د.فهد ما يمشي الوضع عنده كده. لو تكرمتي يتصلح الوضع من الشفت الجي لا تجيبولي الكلام.

8- مرحبا دكتورة،

  • هلا دكتور. بشرني ايش صار على الطالبات مع الإنستركتور؟ كانوا حيرسلولي اللي عملوا مشكلة معاها بس شوفة عينك عدد حالاتي أكثر من استيعاب الشفت.

9- ألو سلام عليكم،

  • وعليكم السلام. دقيقة اعطي البسَة لبنت الجيران واقفة عند الباب. بأرجع ادق عليك.

10- مرحبا،

  • مرحبتين. ترى أنا نايمة، مع السلامة.

11- معاك آرامكس مرحبا،

  • ايوة، رسلت لكم على تويتر مارديتو ممكن أعرف الشحنة وصلت ولاّ لا؟ ترى بعد كل هالتأخير ماراح ادفع قيمتها لو جبتوها بعدين.

12- ألو تسمعيني؟

  • لا مو سامعة ولو سامعة برضو مو سامعة.

13- ألو مين؟

  • أنا دكتورة جيت اضربك إبرة عشان ماما قالت عزوز مايسمع الكلام.

14- مرحبا،

  • هلا، بالله شيّكي ايميلك بسرعة.. رسلت لك البوربوينت مرة حلو شوفيه واعطيني رأيك عشان حقدّمه بكرة مع كامل القلق والإرتباك!

15- مساء الخير،

  • مساء النور. دقيقة ابغى اقرا لك قصيدة المباني شوفي تنفع أرسلها إهداء ولا استحي على دمي واخليني مع كتاب الفسيولوجي أصرَف؟!

16- مساء الخير،

  • مساء النور وما ابغى اعلق على شي قبل ما تعتمدي الميتنق. أو اعطيني صلاحية اسويه بس ماراح ينحط على الإعلان غير اسمك.

17- مساء الخير،

  • اهلين. جي ولاّ رايح؟!

18- مرحبا،

  • مرحبتين. انتو كلكم بخير؟

19- مرحبا دكتورة .. رسلت لك على الواتس اب.

  • اهلين عزيزتي. ما انتبهت للمسج بس عارفة موضوعك. شيكي بعد ساعتين على ايميلك بأرسل لك نوتس اقرئيها واتوكلي على الله و روحي مقابلتك وقلبك مطمن.

20- سلام عليكم..

  • وعليكم السلام أستاذة منال. كملت مع القروب تغليف 100 كرتون بشريني إنها حتترسل للناس اليوم.

21- ايوة دكتورة سلام عليكم..

  • وعليكم السلام اهلين خديجة. عزيزتي أنا مو مؤهلة أحل مشاكل الإنتيرن بس المستشفى قابلة للتأقلم وأنا عكسك ما ارتحت لما اشتغلت في مستشفى (……..) على حسب نفسيتك وطريقة تفكيرك لو قبلتي بكلامي إن المشاكل الإدارية هنا أقل بكثير من هناك.

22- مرحبا،

  • مرحبتين. ترى رديت على المكالمة عشان أسمع و بس. ماعندي كلام.

23- مرحبا،

هلا. قبل ما تبدئي. من فين جبتي الرقم؟ يا تجاوبي فضلاً أو أقفل مع احترامي.

24- هلا بالزين،

  • اهلين حبيبتي. تعالي اوريكي هديتك قبل ما يوصلوا الضيوف.. عشان لا يغارون منك!

25- صباح الخير دكتورة،

  • صباح النور. ميتنق بليز. خلال نص ساعة احتاجكم كاملين في الغرفة و نبهي ع الكل السبيكنق حيكون انقلش عشان د.آدم حيتواجد معانا.

26- صباح الخير.. كوفي؟

  • صباح النور. لا..قهوة : )

27- يسعد صباحك دكتورة،

  • وصباحك دكتورة. سلامات .. سمعت انك تعبتي شوية أمس، وكنتِ مريضة متمردة زي ما قالوا : )

28- صباح الخير..

  • صباح النور أستاذ. بليز الله يسعدك أستاذ طلع تقييمي؟ ما حأعرف أكمل الدوام اليوم بدون ما اطمن على الدرجة.

29- سلام عليكم أبلة،

  • هلا بالبطلة. فين صاحباتك؟ كلميهم بسرعة واعزميهم في غرفتك. جبت لكم هدايا وأشياء تحبوها عشان كلكم شاطرين واتعافيتوا الحمد لله.

30- مساء الحب يا الناجحة،

  • مساء الورد يا المتفوقة. يعني دحين خلاص كم يوم وناخذ البورد؟ ويعطونا شهادة مربوطة بفيونكة وكده؟ ولاّ خلاص هرمنا على حركات البكالوريوس؟!

31- مرحبا، طمنيني على صحتك .

  • ادعي لي. ما ابغى غير يوقف النزيف. بتحمَّل ألم الورم بس احتاج أصلِّي. احتاج اسجد لربِّي. ادعي لي اترحم من الدم و الباقي مقدور عليه.

32- هاااااااااااي يا حلوة..!

  • اوه، ألف شكر يا الأحلى والأجمل..مدام جايبتلي كل هالكتب الجميلة أكيد أصير حلوة. الكتب مكياج نفسيتي فكل المناسبات.

33- اهلين يا الطيب الغالي..

  • عزيزة يا خالتي والله و شوفتك غنوة .

35- مرحبا دكتورة. تعالي بليز لل rehabilitation. دكتور صلاح ماجا و الطلاب مو عارفين كيف يبدأوا.

  • أنا كمان ما أعرف الانستركشن بالترتيب هنا. بس بسأل دكتورة فاطمة كانت متدربة هنا. يصير أجهز لهم ورقة كتالوج كاملة لكل شي لازم يسووه واتابع معاهم الين يخلصوا. قولي لهم يستريحوا ساعة بس و وصي الكافتريا تجهز لهم فطور حسب طلبهم ولا يدفعوا شي.. أنا عازمتهم.

36- سلام .. كيفك اختي،

  • هلا بالغايب الحاضر. ريحتك نعناع. رحت المدينة وما نسيت طبعاً تسلِّم لي على الرسول. صح؟

37- هاي لولي، خلصتي مذاكرة؟

  • خلصت وراجعت وخلصت و راجعت الين نسيت ايش المادة أصلا.

38- مرحبا عزيزتي أشعار، ممكن تنصحيني بثلاث مدونات صالحة للقراءة في كل وقت؟

أهلا. أنا مو مؤهلة لإعطاء نصائح. بس هذه المدونات خاصة و محبوبة وأصحابها يشبهوني وأشبههم في أمور رئيسية كوَّنَت شخصياتنا لذلك اقرأها باستمرار حتى لو مافيها تحديثات, وما قد حسيت بالملل:

http://prom2000.blogspot.com/

https://24nj.wordpress.com/

https://ahmedalhokail.wordpress.com/

39- صباح الخير، ممكن أتكلم كثير؟

  • صباح النور. ما دام الموضوع في رسالة. أنا منصتة جيدة. لكن لطفاً لا تطالبني برَد سريع.

40- سلام عليكم، دكتورة ممكن تقرين هذه التحليل وتدليني على علاج مفعوله مايطول؟

  • وعليكم السلام. فيه عندك حساسية في الدم. لازم تراجع أخصائي عشان يشخص سببها وعلى أساسها يحدد العلاج الصح. التشخيص عن بعد عمره ما كان دقيق. أعتذر أنا ما أعطي استشارات ولا أعالج عن بعد.

41- مرحبا،

  • هلا.. ادخلي واجلسي ساكتة المباراة بدأت ومو من مصلحتك تستفزيني ترى.

42- مرحبا..كيفك الحين بشري عسى اتحسنتي؟

  • الكيماوي ما يجيب العافية يا فاطمة. الكيماوي يحرق. يحرِق العافية و بس.

43- مساء الخيييييييييييير.. مفاجأة صح؟

  • نصر و ذهب و فوقهم باقة ورد و العشا سليق؟! كيف ما اتفاجأ واتفاءل و كل شي. يا مساء الجَمال.

44- مرحبا أشعار، أنا مصرة أشوف اليوم فيلم على ذوقك. لا ترديني.

45- صباح الخير، وكل عام وانتي بخير..

  • وانت بخير. وهذا هو اللي يهم.

46- صباح الخير،

  • بليز بعدين بألحق الاوبريشن.

47- سلام دكتورة. رايقة ما شاءالله مع انه اون كول.

  • اهلين. وانتي يا لطيف مرة مبوزة. مدري ليه الشغل يتعسكم! أون كول يعني تسمعي دعوات طيبة أكثر من اللي تسمعيها في الشفت. مو رايقة قد ما أنا متشوقة أريح المرضى واسمع دعوات طيبة احتاجها.

48- صباح الخير،

  • يسعد صباحك يا اخويه. وحشتني والله وعمرك طويل. أمس اتعلمت المعدوس عشانك. يقولوا بكرة حتمطِّر. تعال انت والبنات اتغدو عندي واسوي لكم أحلى معدوس.

49- أهلا تعالي احنا هنا يا النفسية. (!)

  • لو الدكتور نفسية فهذا عشان متحملكم وساكت عشان واجبه يسمع ويتحمل ويسكت يعني مفروض تسووله تمثال مو تتمسخروا عليه وتقولوا نمزح!

50- مرحبا دكتورة. اتفضلي هذا تقويم معاه معلومات وحكَم بعدد أيام السنة.

  • الله.. هذا تقويم من زمن الطيبين. ألف شكر يا عم سلمان.